Etxalteen eta bortüaren artean diren alhagiak haboro eta hobeki baliatzeko, Eüskal Mendia Leader programaren kari, xedeen presentatzeko dei bat zabaltzen da . Azken urteetan, bortüko güne zonbait erabili gabe ützirik izan dira eta ondorioz franko zinkintü dira. Ata, bazken prezioaren goratzea denbora hontan, etxalteen bazken mailako autonomia lagüntzen ahal lüke eta audela üngüramena zain leioke. Güne horietara aisago heltzeko, horien xahatzeko, huraren ekarteko eta beste, Ossau Irati sormarkan diren laborariek 12 000 euro artinoko sos lagüntza esküalatzen ahal düe. Haatik, sos zama orokorra mügatürik beita, xedeen haütü bat eginen da. Txostenak edo dozierak Lürraldea.net internet günean biltzen ahal dira orai danik edo lagüntzaren eskatzeko  05.59.46.51.01 zenbakiala deitzen ahal da. Xedeen presentatzeko epea arramaiatzaren 30ko finkatürik da.

Entzün Pepela Mirande Xiberoko Botingoako lehendakaria :

Aitzineko egünetan, hartzaz abiatürik den kontsülta aipatzen geneizüen eta hitza eman geneion André Cazetier Mourenxeko aüzapez ohiari. Kontsülta, üngüramena zaintü behar zela konzientzia harazteko parada zela erraiten zeikün. Aldi hontan, Sébastien Üthürriague Larraiñeko aüzapezari hitza eman deiogü.  Sébastien Üthürriaguen araberan, kontsültak ez dü interesik, jakitez deliberoa aitzinetik hartürik dela eta arrapostü emanen düen gehiengo handia, hartzaren sararazteko alte dela. Bestalde, Larraineko Herriko kontseilüa kontreko delibero bat hartüko düala baieztatü deikü. Ondoramen txarrak izanen direla bortüko laborantsarentako gehitü deikü eta turismoari ere ez zaiola deüs honik ekarriko. Audela afera hontan, lürraren jabegoa eta libertate galtzeko arriskü handia badela Sébastien Üthürriague Larraiñeko aüzapezaren ustez.

Entzün Sébastien Üthürriague Larraiñeko aüzapeza :

Eüskal Herri osoko Bio identifikazio baten sortzeko gogoeta eramaiten ari da Biharko Lurraren Elkartea azken bi urteetan. Lan hori, Hego Eüskal Herriko ENEEK edo Euskadiko Nekazaritza eta Elikadüra Ekologikoaren Kontseilüa egitürarekin partekatzen dü. Marka, labela, zertifikazio enpresa, formakuntza egitüra, orano argitü gabe da Eüskal Herriko Bio identifikazioak zer forma hartüko düan. Bena segür dena da, herritaren eta kontsumizaileen informatzea datekeala bere lehentarzünetarik bat. Mementoko, Eüskal Herriko Bio identifikazioa, Frantzian berriki sortü den eta franko xorrotxa den Bio Cohérence labelaren arauetan bermatzen da. Eüskal-Herriko Bio identifikazioaren sortzeko beharra sortü da, Europar Batarzünako Bio arau berria arintürik izan beita eta agronomia eta hazkuntza biologikoaren filosofiatik gerogo eta haboro hürrüntzen beita.

Entzün Thomas Erguy B.L.E alkarteko animazailea :

Egüberriko axüri merkatüa uste beno hobeki iragan da Xiberoko CAOSO eta AXURIA kooperatifentako. Bien artean gütti gora behera, 64000 axüri saldü dütüe. Salmentaren % 90a Espaiñako merkatüan egin da eta laborarier 3.70 eta 3.85 euroren artean kiloa pakatürik izan zaie. Üsatü konkürentzia Aveyron eskualdearen ganik ez da hainbeste senditü, hanko axuriak Italiako merkatüan saldürik izan beitira. Frantziako merkatüa aldiz, oso txarra izan da. CAOSO kooperatifako Jean Marie Etxegorriren araberan, frantsesek beste aragi mota erosi düe, hala nola basa ihizea. Urte hatsarre hontan prezioak jadanik tipitzen hasi dira. AXURIA kooperatifak, pusketan saltzen den axuria merkatüan ezarriko dü indarra eta CAOSOak aldiz karkasak kongelatüko dütü, aragia berantago saltzeko, bataz besteko 3 euroko prezioa etxekitzeko esperantxarekin.

Entzün Jean-Marie Etxegorri CAOSO kooperatifako ardüradüna  :