Antzerkiak bere püblikoa badü Xiberoan ! Beste behin frogatürik izan da, Mauleko Maiatz Tauladan festibalak kaüsitü düan arrakastaz. Tokia antzerki taldeak, urtearen kursean ikastetxeekin eramaiten düan lana eta ateleriak bere ondorioak ekarten dütü. Festibala izan da lan horren erakustea bena kanpotik beste talde ta ikusgarri jinaraztea egitarauaren aberasteko. Püblikoak bere aldetik, bere küriositatearen betatzeko, obra berezi bezain ezbardinen ezagützeko gogoa erakutsi dü beste behin ere. Hatik, ahalak beharrezkoak direla kültüraren bermatzeko erran deikü Mixel Foucher antolazaleak eta Mixel Etxebest Mauleko aüzapezak baieztatü deikü, Herriko Etxeak bere ekarpena etxekiko düala, herritarrek festibalari beren etxekidüra erakutsiko düeno.

Entzün Mixel Foucher Tokia antzerki taldekoa eta Antzerki Festibalaren antolazalea :

Hamar urte betetzen dütü aurten «Maiatza tauladan» Mauleko Herriko Etxeak eta Tokia antzerki taldeak antolatzen düen hitzordüak. 10 urte eta egün bat jei gütiago. Sosa xühür dela eta, antolazaleek deliberatü düe festibala llabürtzea bena eskentza beti zabal eta aberats baratzen da. Ostegün arrestia, eskola eta ofizioaz kanpo diren antzerkilarier eskentürik date, ostirale goiza bezala. Ostirale arrestiarekin ofiziozkoak hasiko dira. Eskentza aldetik, neskenegüna date egünik kargatüena, goizanko 10 danik hasiko beitira jeiak, gaüan berant arte. Aurtenko « Maiatz taulada" maiatzaren 24-25 eta 26an igaranen dira Maulen. Ikus egitaraua.

Entzün Bernadette Lahargoue Mauleko zinegotsia eta Michel Foucher Tokia antzerki taldekoa : 

"Orhitzapenak" ikusgarria emanen da bigerren aldikoz Eskiulan maiatzaren 26an gaüko 21etan Peko Plazan. Iragan apirilaren 21ean Oloruen emanik izan zen lehentze eta ikusiz zer arrakasta üken züen, Geliote gela ttipiegi baratü zen. "Aitzina Eskiula" alkarteko ardüradünek deliberatü düe ikusgarria berriz emaitea eta herrian aldi hontan. Erran behar da, dantza eskolako 30 gazteek lan handia eraman düela beren erakasleer esker eta ikusgarria asmatü düan Julien Iratxeti esker. "Orhitzapenak" ikusgarria, gazte denborako oritzapenak jorratzen dütü dantza eta kantoreen bidez. Ikusgarria Eskiulako Peko Plazako arrabotüan iraganen da, maiatzaren 26an neskenegünarekin gaüko 21etan.

Entzün Jean-Mixel Urruty "Xahü" Aitzina Eskiula alkartekoa : 

Alain Sistiaga tintalari Lapurtarra eta bestetik, Koldobika Jauregi Gipuzkoarra eta Eüskal-Herriko zizelari ezagünen lanak ikusgei dira Mendikotako Algarrekin galerian. Azken honek harria lantzen dü haboroenik bena egürra eta bürdüina ez dütü baztertzen. Egürran zilografia ere egiten dü eta bürdüiñan aldiz, azken teknolgier esker nahi düanaren margotzea kausitzen dü. Bere arte lanetaz bizitzen den artista da, Guggenheim müseoak bere obrak erosi dütü eta erakusketa oso bat ere manhatü. Bi artista horien lanak Mendikotako Algarrekin galerian ikusgei dira ostiraletik iganteala 14.30tatik 18.30tara maiatz ondarreala. Bestalde, Eüskal-Herriko hamar bat artisten obrak erakutsi dütüan galeria honek, borten zerratzeko mespetxüan da sos arrenküren gatik.

Entzün Alain Sistiaga tintalaria :