« Xora » Xiberotar filma ildoa hartüz, "Hebentik"  kültür üztargoak, zinema Xiberoko güne ezberdinetara ekartea dü xedea. Fikzio, dokümental, kanpoko ala hebenko lanak,  denetarikoak dira ikusterat eskentürik diren obrak. Ürrietaren 12an arratseko 20.30 Ligin “Alfitxan” zaükü hitzordüa emanik, bi dokümentalekin. Biak Euskal Herriari lotürik dira. Bata 58ko urtean eginik izan da “ Gerezietako eüskal erretora” dü izena…arraileriaz josia, kontrabanda eta eükal arimaz mintzo dena. Bigerrena, "Xiberoan” deitzen da. Laborari, ofiziale, Mendi Tinietako lasterkaldiaren lehen urteak eta 58ko “ Bereterretx” pastoralaren mustrakak ageri dira.  Biharamenan, neskenegün goizan 10tan, “Chez Ibar” dokümentala date hedatürik, Ibar ostatüan edo Dedeenean Maulen. Lehenago, Ibarreneko “ Dancing” denborako erreportajea da hor agertzen.

Entzün Mixel Etxekopar Hebentik kültür alkartekoak : 

Maindi Murua izan da erabazle Xilaba, Xiberoa-Lapurdi- Baxe Nafarroako bertsularien lehen kanporaketan Altzüruküko gelan. Bigerren leküan agertzen da Ane Txoperena, 3. leküan Ortzi Idoate, 4. gerrenean Egoitz Zelaia, 5. lekuan Xan Alkat eta  6. lekuan Ortzi Murua. Geien aldetik, sürprise zonbait izan dira, hala nola, Xarrikota-Peko eta Bil ta Garbien arteko borroka, edo sozial gei elibat. Kobla honak eta fiak emanik izan dira eta püblikoaren aldetik parte hartze hona izan da hiru probintzietarik jinik. Ondoko hitzordüak dagün ürrietaren 13an Kanbon 2. kanporaketaren jokatzeko, ondotik ürrietaren 20an Hendaian eta 27an Donibane-Garazin. Finala datekealarik azaroaren 10ean Baionan.

Entzün Maindi Murua kanporaketako erabazlea : 

Sartze idatzlan aberatsa proposatzen dü Asto Belarra argitaletxeak. Ürrieta hontan, hiru libürü plazaratürik dira. Bi ttipi « Laissez faire la nature » , « Abeille et Papillon » hamar bat orrialdekoa eta azkena lodixago « Bonheur d’agir ». Bestalde, abentüan plazaratü nahi düen « Pansement 2 » libürüarentzat, aitzinetik izen hartze bat hasi düe. Horrez gain, logo berri bat gehitüko düe libürü güzietan "Xiberoan eginik". Azken hortan, Xiberoko erredola ageri da eta lehu bat izateko partez hartz bat da. Ikur berri horrekin, kitzikan txostakatü nahi düe. Ororen gain, azpimarratü nahi düe Xiberoan den argitaletxe batek lan egiten düala.

Entzün Laurent Caudine eta Etienne Boyer Astobelarra argitaletxeko ardüradünak : 

Hitzekin txostakatzez, eüskararekin txostakatzea eta gozatzea asmüarekin hasiko da XILABA, Xiberoa, Lapurdi eta Baxe-Nafarroko bertsularien txapelketa, xapel meta. Lehen kanporaketa, ürrietaren 6an iraganen da Altzürükün arrestiriko 17etan sei bertsulari lehiatüko dira, Ortzi Murua, Ortzi Idoate, Maindi Murua, Maddi Ane Txoperena, Xan Alkhat, eta Egoitz Zelaia. Bigerren kanporaketa ürrietaren 13an iraganen da Kanbon beste 6 bertsulariekin. Alde batetik, Amets Arzallus txapeldüna lehian sartuko da, Hendaiako final erdiaren kari, Eneritz Zabaletarekin batean. Bestetik, Hodei Barroso txapeldün ordaria eta Sustrai Kolina, bigerren final erdian ariko dira. Final erdiak ürrietaren 20an Hendaian eta 27an, Donibane-Garazin jokatüko dira eta finala azaroaren 10an, Baionako Lauga gelan.

Entzün Xan Alkhat bertsularia eta bertsu erakaslea :