Igaran ostirale goizan (barantailaren 3a) Pauen, Hezkunde nazionalaren ordezkarritzan egin zen jünta batetarik, hein bat botzik elki dira sindikatak. Proposamenak alde honealat doatzala  zioien bilküratik landa. Xiberoari dagokionez, Mitikileko eskola den bezala baratüko da, Barkoxek RPI bat edo eskola botitze bat egin beharko dü, Sohüta edo Eskiularekin eta Santa Graziko eskolak zabalik jarraikiko dü aurten ere. Bestalde, elebitarzünaren galtoa gora doala erranik izan da. Orai artino, 5.300 haur dira elebidün sisteman eskolatürik, 250 sartzekoak direlarik 2017an. Esperantxa da 13 günetan murgiltze edo eüskara lehentarzünezko sistema baten ezartea ama eskoletan. Galtoaren eretzean, eüskaraz formatürik diren erakasle eskaza agertzen da. Ikuskaritzak egin proposamenak, barantailaren 13an trenkatüko dira orozbakoz….
UNSA sindikatüko Daniel Sainte Cluque :

Alderdi Sozialistaren barne-bozken edo primarioen lehen ützülia date igantean. Xiberoan bi bozka bülego izanen dira, bata Atarratzen eta bestea Maulen. Xiberoan talde batek antolatzen dütü bozkatze horik. Horietan da, Arnaud Villeneuve Atarratzeko aüzapeza. Bere ustez, oso importanta da demokraziarentako holako bozkatzeak izan ditean eta herritarrek üken dezen parada beren ikusmoldearen emaiteko. Mauleko bozka bülegoa, karrikapeko eskolan, Barennes anaien karrikan, Arbailletako eta Pettarreko jenteek botza eman ahal ükeen dezen. Atarratzeko Herriko Etxean aldiz izanen da, aldiz, Basabürüko jenteentako bozkagünea. Bozka bülegoak zabaltüko dira goizanko 9 orenetan eta zerratüko arratseko 7 etan. Parte hartzeko baldintzak : behar da bozkazale zerrendan ekarririk izan, euro bat pakatü eta hitzarmen bati izenpetü beharko da ere, zointan hitz emaiten den eskerra eta ekolojisten baloreekin bat egiten dela.
Arnaud Villeneuve :

Sohütako agiantzetan, Chrystelle Mange aüzapezak, 2016ko urteaz bilan bat egin dü eta egingeiak ere bai aipatü dütü. 2016an, obratü dira, aspaldian aipatzen ziren xedeak, hala nola : karrikan segürtantxaren hobetze lanak egin dira, leheneko eskola berritü da ONFren han instalatzeko, web günea berritü da eta karrikako argiak kanbiatü dira. 730.000euro kostatü düe karrikan egin diren lanek. Gaztelaia eskola berriak arrakasta handia badü eta bakantza denboretan güne hori baliatzen da haurren inganiogüne gisa. Oro har, Sohütako aüzapeza eskola horrek düan fama hona bürgoi agertü da. 2017 ko xedeak, berriz hauk lirateke : Hokiko eskolaren berritzea, bilgüne baten eta bi bizigiaren han egiteko ; bestalde karrikan plantatüko dira hiru entrepresa : EMO, Etxe formation eta Axuria Kooperatiba. Horientako herriak botüra baztergia bat eginen dü. Azkenik ,gogoetak jarraikitzen dira pirripita edo bizikleta kurrigia baten egiteko reta egingei honentako üngürüneko herriekin ikertze bat egin behar lizate !
Chrystelle Mange :

Ostirale gaüan, Maule-Lextarreko HErriko Etxean emanik iazn ziren agiantzetan, 2017an lan hanitx abiatüko direla segürtatürik izan da. Hala nola, Espartiñaren Ateleria, Ospitalearen arraberritzea, Artzatze Etxea, Agerria, eta hiru berogailu sareen hedatzea. Ospitalea da habororenik aipatürik izan. Nicolas Campestre orai arteko züzendaria, erospen eta informatika sailaren ardüradün bilakatü da. Corinne Solana, aldiz, züzendari bilakatüko da, orai artinokoan jenteetaz eta sendagintzaz oküpatzen zelarik. Bestalde, beste kanbio zonbait ere eginen dütüe barne antolakaren aldetik. Hala, artatze zerbütxü hobeago baten eskentzea pentsatzen düe. Agerria ere aipatü da, dagün bedatsean abiatü behar beita, jakitez sükaltaririk ez dela oranokoan. Berogailüen sareen aldetik, helbürüa delarik Xiberoko egürraren heben berean erabiltea, 3 sare badirate abiatzeko. Ospitalearen eta Artatze Etxearentako ; Herriko Etxearen eta Herri Alkargoaren arteko egongientako bai eta ere Jai Alai, Kabale Ehogia eta Igeriskagiarentako.
Michel Etxebest :