Sorkuntza saileko CROS akademiaren saria lortü düe, Mixel Etxekopar eta François Rossé soinülariek, Elkar dizketxearekin plazaratü düen «Transhumantzia» dizkarentako. Akademiak jakinarazi düanaz, saria eman izan zaie tradizioari eman deioien tratamentü garaikidearentako. CROS akademia oso famatürik da Frantzian eta erreferentzia da müsika sailan. Mixel Etxekoparek erran deikünaren araberan, ez düe deüs berezirik egürikitzen sari honekin, baizik eta orai artino bezala Europa osoan kontzertüak emaiten jarraikitzea.

Entzün Mixel Etxekopar CROS sariaz mintzo : 

Beren ez adostarzüna sorküntzaren bidez agertü dütüenak dütü omentüko Xiru festibalaren 23. edizioneak, « Ez zirelakoz bat » izenbürüa hartüz. "Ez dok Hamahiru" taldea, Eñaut Etxamendi, Joseba Sarrionandia, emazteak, Amazir popülüa ala preso direnen hitz eta kantoreak, bestea beste dira haütatürik izan ez adostarzün honen adibide. Xiru festibala martxoaren 30tik apirilaren 1 arte date Gotaine-Irabarnen.  Müsika, dantza, kantore, antzerki, ipuin, pelota partida eta herri bazkariaren üngürüan iraganen da. Bestalde, "Utürzabala"ko eremüan eraikiko da, Chahab irandiar zizelkariaren lan bat eta azkenik haurrer ere arte bat emanik izanen zaie, Joseba Sarrionandia eta Eñaut Etxamendiren sor lanetara paratüko beitira…

Bere iraultza ixilaren aitzina eramaiteko nahiküntea berrietsi dü Eüskal Kültür Erakundeak Maulen egin düan biltzar nausian. Haütetsi eta kültür alkarte andana baten aitzinean, Erakundeak kültüraren garapen iraünkorra eta zabaltzearen alde egiten düan lanaren bildüma egin da. Gizartea kanbiatzen den bezala, barne eztabada eraikizale eramanez, erakundearen lan ildoak kanbiatzen ari dira. Egitüra püblikoak edo alkarteen partaidegoarekin, geroago eta haboro lan egin beharko dela azpimarratürik izan da, gogoetak eta ekintzak betan eramanez. Kültüraren osagarria hizkuntzaren egoerari lotürik beita, kültür eragileak eta haütetsiak aho batez mintzatü dira erraiteko, legearen bidez eüskara ezagütü behar dela lehen bai lehen.

Entzün Pantxoa Etxegoin Eüskal Kültür Erakundeko züzendaria :

Lehentze, Libürüaren Egüna antolatürik zen Maulen. Jenteen aldetik beti haboro egürikitzen bada ere, jentea huillantü da eta pentsatzeko da ondoko urtetan bere püblikoa atzamanen düala Literatür agerpen berri honek. Eüskarazko libürü eta argitaletxe andana bat bildürik ziren parropiako gelan eta eüskarak behar düan presentzia üken düala, azpimarratzeko da. Mintzaldiek ere, arrakasta üken düe eta antolazaleak botzik agertzen dira. Hots, esperantxa da ondoko urteetan ere, holako xede bat berriz eramanik izanen dela.

Entzün Julie Berzetxek Mauleko hiriko kültür ardüradüna :