- Laborantxa / Üngüramena
- Agerraldiak: 2167
Laborari geiak kümitatzen dütü ELB Gazte sindikatak.
Baigorri eta Hazparnetik landa, Gameren Xiberoan dateke ELB laborari sindikataren gazte adarrak antolatzen düan Kafe Instalazio delakoa. Laborantxa mündüari interesatzen bazide edo instalatzeko xedea baldin badüzüe edo düala güti instalatü baldin bazide, behar diren informazioen biltzeko parada eskeinirik zaizüe. Goxoki eztabadakatzeko, galderren pausatzeko, bakoitzaren pentsamoldea edo esperientzia adierazteko leküa izanen da denentzat, azaroaren 6an ostegünarekin gaüko 20.30etan Gamereko Aguer ostatüan, ELB Gazte antolatürik AFI alkartearen lagüntzarekin.
Erramun Etxecopar ELBko kidea :
Algar Etxeki, Xiberoan laborantzako ordezkatze zerbütxüa antolatzen düan alkartearen urte biltzarra egin da iragan astean Lakarrin. Alkarteak, berehün ta berogei ta lau kide zütüan, eta aurten beste hamabost jüntatü dira. Ixtripüen gatik lau ordezkak eta beste bederatzü eritarzünen gatik, orotara bi mila bederatzü ehün ta berogei ta hamabost oren ordezka kudeatü dütü. Azken urtetan zailtarzünak dütüe leküko ordezkarien atzamaiteko eta ondorioz bide gastüak emendatü dira. Algar Etxeki alkarteak aholkatzen dü laborarier, ordezkarien txerkatzea beren üngürünean fres horien ttipitzeko gisan. Erretretan direnak edo etxeko gazteak ere ordezka sisteman sartzen ahal dira.
2012-2013a urte zaila izan da Idauze-Mendiko CAOSO kooperatifarentzat. Biltzar nausian presentatürik izan ziren kontüak 10000 euroko defizita erakutsi züen eta kidezionearen aldetik, zortzi hazle berri sartü baldin badira kooperatifan, 13 joan dira. Ondorioz bost mila axuri gütiago ekarririk izan dira. Hala izanik ere, kooperatifak ez da xede eskasean bere egoeraren hobetzeko. Saltzen dütüan axurien ehüneko 95a Españan saltzen dütü CAOSO-ak eta merkatü bakar baten menpe ez egoiteko, Donibane Garaziko kabale ehotegian axuri haragia pikatzen dü orai, beste merkatüen hunkitzeko eta orai ISPAC enpresa ohian haragi pikatzeko beste atelier baten sortzeko aztertzen ari da Axuria Kooperatifarekin.
Ardi eznadünen sailako partaideak bildürik ziren iragan ürrietaren 31an Xiberoan, Irabarneko gaztelüan. Ezne eta gazna ekoizpena ehüneko 4ez emendatü bada, ekoizteko fresen emendatzeak bilana baldintzatü düala erranik izan da. Ezne ekoizleen errebenioak, etxalteka, bataz beste 4000 euroz ttipitü dira. Hala izanik ere, ardi eznadünen sailako ardüradünek konfidantza etxekitzen düe eta esperantxa düe azaro erdian, Ossau Irati sormakaren promozionearen egiteko, telebixtan abiatüko den kanpañak frütüak emanen dütüala. 
Axurien eritarzünetak zoin diren eta nola menperatzen edo zaintzen ahal diren ? aipagei horren jorratzeko laborariak kümitatzen dütü Departamentüko Marexalen talde teknikoak. Goizeko 9.30etarik arrestiriko 16ak artino, axurien eritarzün ezbardinak aipatüko dütüe, nola xendatzen ahal diren bena bereziki eritarzüna agertü aitzin zer egiten ahal den horren saihesteko edo pürü ondorioen tipitzeko barnatüko da. Marexaleek esperantxa düe laborari franko hüilantüko direla, haientzat beharrezkoa beita ere beren esperientzaren ükaitea. Egüerdiko bazkaria eskainirik date. Izenak eman behar dira lehen bai lehen deitzez, bakotxaren marexalaren bülegoala.