Pireneetako ardi ilheekilan ari den Nature Laine enpresaren izolazionea, emeki emeki bena segürki, bere leküa hartzen ari da frantses merkatüan. Oloruen den enpresa honen ardüradünek, CAOSO Idauze-Mendiko ardi kooperatifaren biltzar nausian parte hartü düe beren aktibitatearen berri emaiteko. Ardi ilheekilanko izolazionea bideragarri izaten ahal da bena hortara heltzeko, denen indarra beharrezkoa da. Ardi hazleen inplikazionea baitezpadakoa dela oritarazi düe Nature Laine enpresako ardüradünek eta ardi ilhe xahüagoa ekartea galdegiten deie.  Beren garapenarentako oso inportanta den zertifikazione baten haidürü da Nature Laine enpresa, egitüra püblikoen merkatüan sartzeko gisan.

Entzün Gilles Detiège Nature Laine enpresako bürüa :

Indüstrialekilanko tratü güziak hausten zütüela jakinarazi düe Ardi Ezne Interprofezioneko ekoizleen ordariek Donapaleün. Iragan barantailan, Baionako Suprefektüran indüstrialekin hitzartütakoa, ez düela errespetatü salatü düe. Indüstrialak, kanpotik ekarritako eznea 7 milliu pintetan mügatzea hitzartü ziren, ekoizleek agorrilan eznerik ez ekoiztea hitzeman züelarik. Berriki bi parteen artean iragan den bilküran, 8 milliu pinta kanpotik sartü zirela jakin düe ekoizleek. Ikusiz hitzarmena ez dela errespetatürik izan eta tratüak eküratürik zirela, leküaren üztea deliberatü düe. Ezne biltze kanpainaren hatsarrea beno hilabete bat aitzin, deiadarra joiten düe ezne ekoizleek, podere püblikoak beren ardüraren aitzinean uzten dütüe eta azpimarratzen düe hebenko laborantsaren geroa zalantzan izanik, beren ekintzak gogortüko dütüela deüs ez bada kanbiatzen.

Entzün Patrick Etchegaray Interprofezioneko ezne ekoizleen ordezkaria :

CAOSO Idauze-Mendiko ardi kooperatifak, bizpahiru hilabeteen barne, bere ardi edo axuriak Donibane-Garaziko kabale ehotegian ehoarazten ahalko dütü.
Berri hona da kooperatifarentako, bere biltzar nausian erranik izan den bezala. Donajunen ürrentzen ari den eraikitze berri honi esker, kabaleak ehoarazten eta puxkakarazten ahalko dütü, merkatüaren galtoari hobeki ihardesteko eta Frantses merkatüan haboro sartzeko. Ber ildoan, ikerlan bat abiatürik dela jakinarazirik izan da, Mauleko ISPAC lantegi ohian, kabaleen puxkakatzeko eta aragiaren kongelatzeko, beste güne baten sortzeko.

Entzün Jean-Marie Etxegorri CAOSO kooperatifako ardüradüna :

"Ovinpiades" artzain gazteen arteko lehiaka, Departamentüko finala eta seigerren edizionea iragan da ürrietan, Berrogaine-Lahüntzeko Laborantxa Lizeoan. Donapaleü, Olorue eta Berrogaineko lizeoetako 30 gazteek parte hartü düe, lehen zortziak Akitaniako finalalat joanen dira urtarilaren 26ean Dordoñan. Departamentüko artzain gazteen lehiakan saristatürik izan direnak : 1. Romain Nassiet Errekart Kolegiokoa  ;  2. Nina Daumis Larpskoa artzain bezala Santa-Grazin plantatzeko xedea düana ; 3. Michel Sanguilhem LPA Olorueko ; 4. Denis Luchila LARPS Gamearra ; 5. Isabelle Eyheralt Santa-Gaztarra Larpskoa ; 6. Yannick Franchistegi  Errekart Kolegiokoa ; 7. Antton Sainte-Marie Errecart kolegiokoa ; 8. Benoit Albizetti LPA Oloruekoa.

Entzün Daniel Lartigue Hazparneko laboraria eta Ovinpiadeko epai mahainekoa :