- Hezkuntza
- Agerraldiak: 3297
Igerixkan ikasteko, xede pedagogiko bat eskoletan
Kolegioan sartü aitzin, ikasle güziek igerixkan jakin beharko düe hebentik aitzina. Hau deliberatü dü Frantziako Hezkunde Ministeritzak 2010eko ürrietan. Mauleko pizina arraberritzen den artean, ikasleek igerixkan ikas dezen, xede pedagogiko bat eraiki düe, Xiberoko eskoletako erakasleek, Hezkunde Nazionaleko kirol aholkülariak eta pizinako igerixkari-erakasleak. Dagün urtetik harat, pizina 7 hilabetez egonen da zabalik apirilatik azaroa arte. Lehen, eskolak hamar bat astez ibilten baziren pizinan, 2012tik harat 22 asteetara iraganen da. Beste kanbio hori ere lagüngarri izanen da, haurrek igerixkan ikas dezen. Azkenean, Mauleko pizina üztailaren 2an zabaltüko da berriz ere.
Entzün Dominika Boscq Xiberoa Herri Alkargoako lehendakaria :
Entzün Eric Bonnaventure, kirol aholkülari pedagogikoa :
Ikastola ezbardinetan bezala, Sohütako Eperra ikastolak bere bortak zabaltü dütü apirilaren 2an. Ikastola aitetamer erakusteaz gain, ikastoletako murgiltze sistema erakatsi nahi da eta ber denboran eramaiten den lana. Eperra ikastolan 105 haur badira orai eta pentsatzekoa da 110etara kasik heltüko direla urte ondarra gabe. Xedeetan, ikastolaren handitzea da langei handiena, düdarik batere gabe. Ondoko baxtimentüa erosirik, arraberritze lanak apirilaren 9tik harat hasiko dira eta 6 hilabeteko lanak izanen dira. Handitze lanak urrentü eta, 150 haurrentako leküa badate Sohütako ikastolan. Azkenean, Integrazio Batzordearen aldeko kantaldia ere antolatürik da apirilaren 9an, Barkoxeko elizan. Xahakoa pastoraleko kürrak eta Baionako Haiz’egoa Abesbatza entzüten ahalko dira eta erabaztea oro, Integrazio Batzordeari emanik date.
Berrogaineko lizeoaren erakaskuntza eskentza hobeki ezagütarazteko, borta zabalak antolatürik dira martxoaren 26an neskenegünarekin. Lizeoan 3 edo 4 gerrenean sartzen ahal da proposatürik diren 4 baxo profezionalen prestatzeko. Ondotik, haütüa bada laborantsa, jenteer zerbütxüa, kabale hazkuntza edo saltzearen baxoaren artean. Horrez gain, nekezian diren ikasleer jarraiki berezia eskentzen zaie. Lizeoak, enpreseetan ere ikastaldi franko proposatzen dütü. Erakaskuntzaz gain, ikasleer aktibitate ezbardinak ere proposatzen dütü. Xehetarzün güzien ükeiteko, 
Barda entzün düzüe balin bada, Berrogaineko Bixta Eder Laborantxa lizeoko ikasleek emankizün bereziak egin dütüe Xiberoko Botza irratian. Alde batetik, laborantxan instalatzeko xedea düenek, beren proiektüeri lotürik diren etxalte ezbardinen bisitak aurkeztü deizküe eta ondotik, Garapen iraünkorraren astea hasiko baita Apirilaren 1ean, hortaz egin kronika eli bat hontü düe. Bi emankizün horiek arra behatzen ahal dütützüe :
« Adolezentziako krisa : mitoa ala errealitatea ? » Konferentzia hau, martxoaren 18ean Maulen iraganen da Dominique Lismonde psikologoarekin. Adolezentzia edo nerabetza, memento handi bat da bakotxaren bizian. Zerentako hainbeste kanbiamen behar den haur denboratik gehitüala iragaiteko ? Zerentako iragaite hau hain gogor den ? Kanbiamen horien ondorioak zoin diren ? Zerentako hainbeste sofritze ? Nola egin behar den, ahal bezain hobe edo ez sobera gaixki igaran dadin ? Gei horietaz mintzatüko da Dominique Lismonde psikoterapeuta martxoaren 18ean ostiralean gaüko 20.30 tan Mauleko zerbütxügünean. Mintzaldi hau ait’ama, erakasle, hezitzaile, animazaleentako da, Karkaila-Xiberoak antolatürik.